Friday, February 15, 2013
တိုင်းရင်းသားအမည်ခံ အထည်ချုပ် လုပ်ငန်းအချို့ နိုင်ငံခြား ရင်းနှီးမြှုပ်နှံမှု
အဖြစ် လမ်းကြောင်းပြောင်း လုပ်ကိုင်လာကြောင်း မြန်မာနိုင်ငံ အထည်ချုပ် လုပ်ငန်းရှင်များအသင်းမှ သိရသည်။
“အမည်ခံ အထည်ချုပ်လုပ်ငန်းအချို့ နိုင်ငံခြား ရင်းနှီးမြှုပ်နှံမှုအဖြစ် ပြီးခဲ့တဲ့ တလကျော် လောက်က လမ်းကြောင်းပြောင်း လုပ်ကိုင်လာကြတယ်။ အထည်ချုပ်လုပ်ငန်း ၁၀ ခု ၁၅ ခုလောက် ရှိခဲ့ပါတယ်။ ဒီလုပ်ငန်းတွေဟာ ၁၀ စုနှစ်ကျော်ကျော် ကြာမြင့်ခဲ့ပြီ ဖြစ်ပါတယ်။ ဒါဟာ ကြိုဆိုရမယ့်ကိစ္စပါ” ဟု ၎င်းအသင်း၏ ဒုတိယ ဥက္ကဋ္ဌ ဒေါက်တာအောင်ဝင်း က ပြောသည်။
ယင်းအပြင် ပြည်ပနိုင်ငံများက မြန်မာနိုင်ငံ၏ အထည်ချုပ်ကဏ္ဍတွင် ရင်းနှီးမြှုပ်နှံမှုကြီးများ လုပ်ရန် ဆွေးနွေးမှုများ ရှိနေသဖြင့် ယခုနှစ်အတွင်း အထည်ချုပ်လုပ်ငန်း ရာချီ၍ ဝင်ရောက်လာဖွယ် ရှိကြောင်း အထည်ချုပ်လုပ်ငန်းရှင်များက သုံးသပ်ကြသည်။
“တင်ပို့တဲ့ ပစ္စည်းအမျိုးအစားပေါ် မှုတည်ပြီး ၁၅ ရာခိုင်နှုန်းခန့်အထိ အခွန်သက်သာခွင့်ပြုမည့် EU ၏ GSP အခွန်သက်သာခွင့်က မကြာမီ ရရှိတော့မှာမို့ မြန်မာနိုင်ငံရဲ့ အထည်ချုပ်လုပ်ငန်း ကဏ္ဍမှာ ဝင်ရောက်လုပ်ကိုင်ဖို့ တောင်ကိုရီးယား၊ ဂျပန်၊ ထိုင်း စတဲ့နိုင်ငံတွေက စီးပွားရေး လုပ်ငန်းရှင်တွေ လာရောက် ဆွေးနွေးမှုတွေ ရှိနေပါတယ်” ဟု အထည်ချုပ်လုပ်ငန်းရှင် ဦးလှဝင်း က ပြောဆိုသည်။
လာရောက်ဆွေးနွေးကြသည့် အထည်ချုပ်လုပ်ငန်းရှင် အများစုမှာ မြေဧက ကျယ်များ တောင်းဆိုမှု ရှိသည်။ အထည်ချုပ်လုပ်ငန်း အကြီးစား ရင်းနှီးမြှုပ်နှံမှုများအတွက် စက်မှုဇုန် မြေကွက်များတွင် တဆက်စပ်တည်း မြေကွက်ကျယ်များ ရရန် လွယ်ကူမှု မရှိနိုင်ဟု ဆိုသည်။
“အထည်ချုပ် လုပ်ငန်းတွေအတွက် မိန်းလမ်းပေါ်က မြေကွက်တွေကို လယ်သမားတွေဆီက တရားဝင် စက်မှုမြေအဖြစ် ခွင့်ပြုပေးမယ်
ဆိုရင် မြေပိုင်ရှင်တွေကလည်း သဘောတူ၊ လုပ်ငန်းရှင်တွေကလည်း ဝယ်ပြီး နိုင်ငံခြားကုမ္ပဏီတွေနဲ့ ဖက်စပ် လုပ်နိုင်အောင် MIC ကလည်း ခွင့်ပြုပေးမယ်ဆိုရင် စက်ရုံတွေ အများကြီး တိုးလာနိုင်ပါတယ်” ဟု ဒေါက်တာအောင်ဝင်း က ဆက်ပြောသည်။
အထူးသဖြင့် အထည်ချုပ် လုပ်ငန်းကဲ့သို့ လုပ်သားအင်အားသုံး စက်ရုံကြီးများ ဖြစ်ပါက အလုပ်အကိုင် အခွင့်အလမ်းများ ရရှိမှု တိုးတက်လာနိုင်သည်ဟု ဆိုသည်။
“တဖက်က ဖက်စပ်လုပ်ကိုင်နိုင်အောင် ခွင့်ပြုပေးမယ်ဆိုရင် လုပ်ငန်းရှင်တွေဘက်ကလည်း စက်ရုံကို အပြီးတည်ဆောက်ဖို့၊ ဒါမှမဟုတ်ဘဲ စည်းကမ်း ဖောက်ဖျက်ရင် ပြင်းပြင်းထန်ထန် အရေးယူမယ်ဆိုတဲ့ မူတခုကို ထုတ်ပေးလိုက်ရင် ပြည်တွင်းလုပ်ငန်းရှင်၊
ပြည်ပ လုပ်ငန်းရှင်နဲ့ အစိုးရ သုံးဦးသုံးဖလှယ် အကျိုးရှိနိုင်ပါတယ်” ဟု အထည်ချုပ် လုပ်ငန်းရှင်များအသင်းမှ တာဝန်ရှိသူတဦးက ပြောကြားသည်။
ခင်မျိုးသွယ်
Mizzima - News in Burmese
0 comments:
Post a Comment