သမ၀ါယမ လီမိတက်ဘဏ်မှ Western Unoin နှင့် ချိတ်ဆက်၍ ကမ္ဘာနိုင်ငံပေါင်း ၂၀၀ ကျော်သို့ ပြည်ပငွေလွှဲပို့ ၀န်ဆောင်မှုလုပ်ငန်း စတင်လုပ်ဆောင်

Friday, 21 December 2012

သမ၀ါယမ လီမိတက်ဘဏ်မှ အမေရိကန်အခြေစိုက် နိုင်ငံတကာ ငွေလွှဲပို့ ၀န်ဆောင်မှုအဖွဲ့ဖြစ်သော Western Union နှင့် ချိတ်ဆက်၍ ကမ္ဘာ့နိုင်ငံပေါင်း ၂၀၀ ကျော်သို့ ငွေလွှဲပို့ ၀န်ဆောင်မှုလုပ်ငန်းကို
ဒီဇင်ဘာလ ၁၄ ရက်နေ့မှ စတင်ဆောင်ရွက်နေကြောင်း အဆိုပါဘဏ်မှ တာဝန်ရှိသူတစ်ဦး၏ ပြောကြားချက်အရ သိရပါသည်။

“ဒီဇင်ဘာ ၁၄ ရက်နေ့က Western Union နဲ့ လက်မှတ်ရေးထိုးပြီး
ပြည်ပငွေလွှဲလုပ်ငန်းကို စတင်ပါပြီ။ မြန်မာနိုင်ငံကို မြန်မြန်ဆန်ဆန်နဲ့
ငွေလွှဲလို့ရပါပြီ။ ငွေလွှဲနှုန်းပေါ် မူတည်ပြီး ၀န်ဆောင်မှုအနေနဲ့ Western Union က ၇၅ ရာခိုင်နှုန်း၊ သမ၀ါယမ လီမိတက်ဘဏ်က ၂၅ ရာခိုင်နှုန်း အကျိုးအမြတ် ရမှာပါ” ဟု သမ၀ါယမ လီမိတက်ဘဏ်မှ မန်နေးဂျင်း
ဒါရိုက်တာ ဦးဖေမြင့်က ပြောကြားပါသည်။

Western Union နှင့် ချိတ်ဆက်၍ နိုင်ငံတကာမှ မြန်မာနိုင်ငံသို့
ငွေလွှဲရာပါက အဆိုပါ သက်ဆိုင်ရာ နိုင်ငံ၏ငွေကြေးဖြင့် လွှဲသော်လည်း မြန်မာကျပ်ဖြင့်သာ ပြန်လည်ထုတ်ယူနိုင်မည်ဖြစ်ပြီး
နိုင်ငံခြားငွေလဲမှုနှုန်းတွင် မြန်မာကျပ်ငွေ၏ ပေါက်ဈေးအတိုင်း ထုတ်ယူနိုင်မည်ဖြစ်သည်။

Western Union သည် သမ၀ါယ လီမိတက်ဘဏ်အပြင် ယူနိုက်တက် အမရဘဏ်၊ မြန်မာ့အရှေ့တိုင်း ဘဏ်နှင့်ပါ ချိတ်ဆက်ဆောင်ရွက်လျက် ရှိကြောင်း၊ အမေရိကန်အခြေစိုက် Western Union သည် ၁၈၅၁ ခုနှစ်တွင်
ကြေးနန်းကုမ္ပဏီတစ်ခုအဖြစ် စတင်ခဲ့သော ကုမ္ပဏီတစ်ခုဖြစ်ြ့ပီး၊ လက်ရှိအချိန်တွင် Western Union သည် အရှေ့တောင်အာရှ
နိုင်ငံများဖြစ်သော ထိုင်း၊ စင်ကာပူ၊ မလေးရှားနိုင်ငံများအပြင် ကမ္ဘာထိပ်တန်း နိုင်ငံများဖြစ်သော အမေရိကန်၊ ဂရိတ်ဗြိတိန်နှင့် အီးယူနိုင်ငံများ အပါအ၀င် နိုင်ငံပေါင်း ၂၀၀ ကျော်နှင့် ချိတ်ဆက်၍
ငွေလွှဲပို့ ၀န်ဆောင်မှုများကို ဆောင်ရွက်ပေးနေသော အဖွဲ့အစည်း
တစ်ခုဖြစ်ကြောင်း၊ အေးဂျင့်ပေါင်း ငါးသိန်းတစ်သောင်းဝန်းကျင်ခန့် ရှိကြောင်း၊ နိုင်ငံတကာ ငွေလွှဲပို့ဝန်ဆောင်မှုအဖွဲ့နှင့် ချိတ်ဆက်
ထားသော နိုင်ငံများအားလုံးကို ငွေလွှဲပို့နိုင်ကြောင်း၊ မြောက်ကိုရီးယား၊ ဆိုမာလီ၊ ဆူဒန်နှင့် အီရန်နိုင်ငံတို့မှာ Western Union အဖွဲ့မှ ၀န်ဆောင်မှုပေးထားခြင်းမရှိသော နိုင်ငံများဖြစ်ကြောင်း သိရသည်။

ပြည်တွင်းပုဂ္ဂလိက ဘဏ်များသည် ပြည်ပငွေလွှဲအ၀င်လုပ်ငန်း၊
နိုင်ငံခြား ငွေရောင်းဝယ်ဖောက်ကားခွင့်နှင့် နိုင်ငံခြားဘဏ်လုပ်ငန်း ၀န်ဆောင်မှု ပြုလုပ်နိုင်ရန် ဂျပန်၊ စင်ကာပူ၊ ထိုင်းတို့ရှိ ဘဏ်များနှင့်
အဓိက ချိတ်ဆက်လျက်ရှိပြီး အမေရိကန်ဒေါ်လာ၊ ယူရို၊ ယွမ်၊ ယန်း၊ စင်ကာပူဒေါ်လာ၊ ဘတ် စသည့် နိုင်ငံတကာ ငွေကြေးများဖြင့်
နိုင်ငံခြားငွေစာရင်း ဖွင့်လှစ်ခြင်းနှင့် ငွေသွင်းငွေထုတ်ပြုလုပ်ခြင်း၊ ကုန်သွယ်ရေးငွေ ပေးချေခြင်း၊ စာရင်းပြောင်းခြင်း၊ ငွေလွှဲခြင်း စသည့်လုပ်ငန်းများ ဆောင်ရွက်လျက်ရှိသည်။


Eleven Media Group

20