|
ရန်ကုန်တိုင်းဒေသကြီး ကျောက်တန်းမြို့နယ်ရှိ သီလ၀ါဆိပ်ကမ်း သစ်လုံးများထားရှိသောနေရာမှ မတ်လ ၂၆ ရက်နေ့ မွန်းလွဲ ၂နာရီ ၁၅ မိနစ်အချိန်တွင် မီးလောင်မှုဖြစ်ပွားခဲ့ကြောင်း သိရှိရသည်။
မီးလောင်မှုစတင်ဖြစ်ပွားသောနေရာမှာ သီလ၀ါဆိပ်ကမ်းရှိ CIFG သစ်ဝိုင်းမှ စတင်လောင်ကျွမ်းခြင်းဖြစ်ပြီး သစ်လုံးများမှတဆင့် အနီးရှိကိုင်းတောများကိုပါ မီးကူးဆက်လောင်ကျွမ်းခဲ့ကြောင်း သိရသည်။ ထို့နောက် ထူးသစ်ဝိုင်းရှိ သစ်လုံးများကိုပါ ဆက်လက်လောင်ကျွမ်းခဲ့ပြီး ည ၉နာရီခွဲအချိန်အထိ မီးလောင်ကျွမ်းမှု ဖြစ်ပွားဆဲဖြစ်ကြောင်း သိရှိရသည်။
မီးလောင်ရာသို့ ရန်ကုန်တိုင်းဒေသကြီးအတွင်းရှိ မီးသတ်ဌာနများမှ မီးသတ်ယာဉ်များ လာရောက်ငြိမ်းသတ်ခဲ့ကြပြီး လေတိုက်ခတ်မှုအရှိန်ကြောင့် မီးကူးဆက်လောင်ကျွမ်းမှုကို ထိထိရောက်ရောက် မထိန်းသိမ်းနိုင်ခဲ့သဖြင့် ယခုကဲ့သို့ အချိန်ကြာမြင့်စွာ မီးလောင်ကျွမ်းခဲ့ရခြင်းဖြစ်ကြောင်း သိရှိရသည်။
မီးလောင်ကျွမ်းမှုကြောင့် မီးသတ်တပ်ဖွဲ့ဝင်တစ်ချို့ မီးခိုးငွေ့များကြောင့် မူးလဲမှုများဖြစ်ပေါ်ခဲ့ပြီး အခြားထိခိုက်ဒဏ်ရာရရှိမှုနှင့် သေဆုံးမှုများမရှိကြောင်း သိရှိရသည်။
| 
0 comments:
Post a Comment