ရက်ပေါင်းကိုးထောင့်လေးရာကိုးဆယ်

ဆောင်းလေပြေလေနုတွေအကြား တောင်ကြီးမြို့ရဲ့ အအေးဒဏ်က အထက်ပြည်အောက်ပြည်အဖို့တော့ ချမ်းခိုက်ခိုက်တုန်ဖွယ် ဖြစ်စေပါတော့သည်။ ထိုကာလ ဖေဖော်ဝါရီလအတွင်း အညတရ ရပ်ကွက်လေးတစ်ခုတွင် မွေးဖွားခဲ့သော ကောင်လေးတစ်ယောက် သိပ်ထူးခြားမှုမရှိသော အရာများဖြင့် သူများနည်းတူမွေးဖွားခဲ့သည်။ ထူးခြားသည်ဆိုလို့ ၀ါးရုံတောထဲတွင် မွေးဖွားခဲ့ခြင်းဖြစ်သည်။ ထိုသူသည် ကျွန်တော်သာဖြစ်သည်။
-----------------------ထ-----------------------------ထ---------------------ထ-----------------------


စစ်တပ်ထဲမှာရှိနေတဲ့ ဖခင်က ဘာရယ်ကြောင့်မသိ စိတ်တိုပြီး ဗိုလ်ကြီးတစ်ယောက်ရဲ့ ၀က်ကို သေနတ်နဲ့ပစ်မိလို့ ကွာတားကျခံရတဲ့အခါ နောက်များ စိတ်တိုတိုနဲ့ကျွန်တော့်ကို “ဟေ့ကောင် မင်းက တနင်္ဂနွေသားမို့ ငါ့နေ့နံနဲ့မကိုက်ဘူး ခိုက်တယ်” လို့ ပြောခဲ့ဖူးသည်။ ဖခင်ရယ်လို့ မဟုတ်ပါဘူး၊ နေ့နံမတည့်တာကို အဖွားလည်းပြောဖူးသည်။ အစ်မကြီးကလည်း တနင်္ဂနွေ၊ ကျွန်တော်ကလည်း တနင်္ဂနွေ၊ တနင်္ဂနွေနဲ့ဗုဒ္ဓဟူး နေ့နံမကိုက်ဘူးတဲ့၊ ဆင်းရဲရင်ဆင်းရဲ မဆင်းရဲရင်ချမ်းသာ၊ အဲ့လိုမှမဟုတ်ရင်လည်း တကျက်ကျက်နဲ့ ခိုက်ရန်ဖြစ်မယ်လို့ လူအများပြောတာကို ကြားခဲ့ဖူးသည်။ ကျွန်တော်ကတော့ အဲ့လို အယူအဆတွေ မရှိပါ။ ကျွန်တော့်ရဲ့အောက် ညီတစ်ယောက် မွေးလာခဲ့သည်။ သူကတော့ တနင်္လာသား ကျွန်တော့်အတွက် အပြစ်ဖို့စရာဖြစ်နေတာလားတော့ မပြောတတ်၊ သူ့ကို မွေးပြီးနောက်ပိုင်း မိသားစုက နည်းနည်းချောင်လည်လာခဲ့သည်။ ထို့ကြောင့် တနင်္ဂနွေသားဖြစ်တဲ့ ကျွန်တော် မိသားစုအတွက် ငယ်စဉ်တုန်းက အကျိုးမပေးခဲ့သူ ဖြစ်ခဲ့သည်။ နေ့နံအစွဲ၊ နတ်အစွဲတို့သည်က မိမိရဲ့ ယုံကြည်သက်ဝင်မှုအပေါ်မှာသာ သက်ဆိုင်သည်ဟု ထင်မိပါသည်။


သားသမီးတွေများလာခဲ့ပြီး ကုန်ဈေးနှုန်းတွေကလည်း လှေကားထစ်လို့ တစ်ဖြေးဖြေးမြှင့်လာတဲ့တာကြောင့် ဖခင်မှာ စစ်တပ်မှ ထွက်ပြီးအပြင်အလုပ်ကိုလုပ်ကိုင်ခဲ့သည်။ ဘုန်းကြီးလူထွက်နဲ့ တပ်ထွက်တွေ အပြင်ရောက်တော့ ယောင်ပေပေလို့ တစ်ချို့တွေက ပြောကြပါတယ်၊ အဲ့ဒီစကားကို ချေပချင်မိတယ်။ အကြောင်းမှာက ကျွန်တော်ဖခင်သည် ယောင်ပေပေမဟုတ်ပဲ မိသားစုတာဝန်ကို ကျေပွန်စွာ ထမ်းဆောင်ခဲ့ခြင်းကြောင့်ဖြစ်သည်။ ဖခင်သည် အပြင်မှာ ပန်းရံအမျိုးအစားထဲက ကျောက်မိုင်းခွဲ၊ ကျောက်ရေတွင်းတူး၊ အုတ်ပလောက်ရိုက်၊ အုတ်စီ၊ စသာတွေအပြင် မြက်ရိတ်တဲ့ အလုပ်ကို လုပ်ကိုင်ပြီး မိသားစုကို ရေလောင်း မြေသြဇာကြွေး ပမာ ပေးဆပ်ခဲ့သည်။ ထိုစဉ် မြက်ရိတ်တုန်းက ကျွန်တော်ဟာ အလွန်ကို ငယ်ရွယ်တာကြောင့် မြက်ရိတ်နေတဲ့အချိန် နဘေးကလိုက် ရိတ်ပြီးတော့ တွန်းလှည်းပေါ်က လိုက်ထိုင်နဲ့ ဒီစာကို ရေးနေစဉ်အတွင်းမှာပဲ အဲ့ဒီပုံရိပ်လေးကို မြင်ယောင်မိသည်။ တစ်ခါတစ်ရံ အဖေနဲ့အမေက လှည်းတွန်းရင်း ကျွန်တော်က လှည်းပေါ်မှာ ထိုင်ပြီး မြက်ပင်တွေကို ဆော့ခဲ့ဖူးသည်။
--------------------------ထ-----------------------------ထ---------------------ထ-----------------------


ကျွန်တော်တို့နေခဲ့တဲ့ ရပ်ကွက်လေးနောက်တစ်ခုက ကရင်မရေထွက်လို့ ခေါ်သည်။ ကျွန်တော်နေတဲ့ အိမ်ဘေးမှာ ကျွန်တော်နဲ့ ရွယ်တူ ကောင်လေးတစ်ယောက်ရှိသည်။ သူ့မိဘများကတော့ အလည်အလတ်ကြွယ်ဝသူတွေပါ သူတို့သားလေးကို ထမင်းကျွေးတဲ့အခါ “သားလေး ကြက်မြစ်စားမလား၊ ကြက်သည်းစားမလား၊ နှစ်ခုလုံးမစားရဘူးနော် နှစ်ခုလုံးစားရင် သေတတ်တယ် တစ်ခုပဲစား” ဆိုတာလေး ကျွန်တော့်နားထဲ အခုထိကြားနေဆဲ။ ကြားနေဆဲဆိုတာ ကျွန်တော်ရဲ့ မိသားစုမှာ အဲ့ဒီတုန်းက ကြက်မြစ်ကြက်သည်းဆိုတာ ဘယ်ဆီမှန်းမသိသေး။ အကြောင်းတိုက်ဆိုင်လို့ နည်းနည်းလောက် ကလေးတွေရဲ့အကြောင်းပြောချင်မိသည်။ လူကြီးတွေက ကလေးသူငယ်တို့ကို စိုးရိမ်စိတ် ကြောက်စိတ် အယူအစွဲတွေ တဖက်သတ်အတွေးတွေကို ပေးသည်ဆိုသည်မှာ အရွယ်ရောက်လာတာနဲ့အမျှ အတွေ့အကြုံများလာတော့ သိလိုက်ရသည်။ အထက်က ပြောတဲ့ ကြက်မြစ်ကြက်သည်း နှစ်မျိုးမစားရဘူးဆိုတာ ကုန်မှာဆိုးလို့ဆိုတာ အရွယ်ရောက်တော့ သဘောပေါက်ခဲ့သည်။ ထို့အပြင် လူအများပြောတာကိုလည်းကြားဖူးသည် “ရေချိုးပြီးမှ ထမင်းစား၊ ထမင်းစားပြီးရေမချိုးနဲ့ ရေပျင်းစွဲတတ်တယ်”တဲ့ ကျွန်တော်က တစ်ကယ်ထင်၍ လိုက်နာခဲ့သည်။ နောက်များမှ ကျွန်တော့်ရဲ့ အဖွားကို ပြန်မေးကြည့်တဲ့အခါ “တကယ်တော့မဟုတ်ပါဘူး၊ ထမင်းစားပြီးရေချိုးတော့ ၀မ်းဟာသွားရော၊ ၀မ်းဟာတော့ ထမင်းပြန်စားတဲ့အခါ ဆန်ကုန်မှာဆိုးလို့”တဲ့။ ကလေးသူငယ်တို့သည် ဖြဲခြောက်ရင် အလွန်ကြောက်တတ်သော အရွယ်တွေဖြစ်သည်။
--------------------ထ-----------------------------ထ---------------------ထ-----------------------

ကရင်မရေထွက်ကနေ အေးသာယာမြို့သစ်လေးဆီကို ပြောင်းရွေ့ပြီးတဲ့နောက်မှာတော့ မိသားစုလေးဟာ ချောင်လည်လာခဲ့သည်။ ကျွန်တော်နဲ့ ကျွန်တော့်ရဲ့ ညီက ဖခင်နဲ့ အလုပ်လိုက်လုပ်ခဲ့ပြီး ရလာတာကို မိခင်ကိုပေးလိုက် အဖွားကိုပေးလိုက်နဲ့ အချိန်တွေကို ဖြတ်သန်းရင်း၊ ကျောင်းဖွင့်ချိန်ကျောင်းတက်လိုက်၊ ကျောင်းတက်ရင်း အင်္ဂလိပ်ဘာသာဆရာမက မီးနင်းအလုံး(၂၀)လောက်ကို ကျက်ခဲ့ မရရင် ဆော်ပလော်တီးမယ်လို့ ပြောလာတော့ ကျွန်တော့်အတွက် ကျောင်းငတက်ပြားဖြစ်ရောပဲ၊ ကျောင်းငတက်ပြားဆိုတာကို ၊ ကျောင်းပြေးတာကို ဆိုလိုပါသည်။ လူငယ်အချင်းချင်းတော့ ကျောင်းသူခိုးလို့ ခေါ်ကြသည်။ အချင်းချင်း မတည့်လို့ စကားနိုင်လုတဲ့အခါ မင်းက ကျောင်းသူခိုး၊ နင်က ကျောင်းသူခိုး၊ အပြန်အလှန်စကားနိုင်လုရင်းနဲ့...၊ အဲ့ဒီလို အချိန်တွေက အခုတော့ ပြန်မရနိုင်တော့တဲ့ ပုံရိပ်တွေသာဖြစ်စေခဲ့သည်။ ကျောင်းနေရင်း အမှတ်ရစရာလေးတစ်ခုရှိသည် အဲ့ဒီနေ့က ကျွန်တော် ကျောင်းမတက်ဖြစ်ပါ၊ ဖခင်ရဲ့စစ်ဖိနပ်ကို_{(စစ်ထွက်ဆိုတော့ စစ်ဖိနပ်စီးပြီး အလုပ်လုပ်ရတာ အဆင်ပြေလို့ ထင်ပါရဲ့ စစ်ဖိနပ်ကိုအမြဲစီးတယ် ကျွန်တော်လည်း ဖခင်နဲ့အလုပ်လိုက်လုပ်တဲ့အခါ အဲ့လို ဖိနပ်စီးဖြစ်ပါတယ်။)} လျှော်ဖွတ်နေတဲ့အချိန်မှာ အိမ်ဘေးနားက သူငယ်ချင်း၊ သူက ကျွန်တော်နဲ့ တစ်ခန်းထဲ သူကလာပြောတယ်ဗျ “အတန်းထဲမှာ စုံညီပွဲတော်မှာပေးဖို့ ဆုကြေငြာတယ် မင်းဒုတိယဆုရတယ်၊ နက်ဖြန် ကျောင်းလာခဲ့ပါတဲ့” အဲ့လိုပြောလာတော့ ဘာဆုပဲရရ ကျွန်တော်အတွက် အမှတ်တရပဲဆိုတော့ ကျွန်တော်လည်း မယုံနိုင်ဖြစ်သွားပြီး “ဟုတ်ရောဟုတ်လို့လားကွာ..” ဆိုပြီး လျှော်လက်စ ဖိနပ်ကို နေပူမှာသွားလှန်းပြီး အပျော်ကြီးပျော်နေတော့သည်...။
-----------------------ထ-----------------------------ထ---------------------ထ-----------------------

ဘာရယ်မဟုတ်ပါဘူး၊ ငယ်စဉ်က ပုံရိပ်များစွာထဲမှာမှ တစ်စိတ်တစ်ပိုင်းကို ရေးချမိလိုက်ခြင်းပါ။ ကျွန်တော့်ရဲ့ စိတ်ထဲ အမှတ်ကြီးမှတ်မိနေတဲ့ မှတ်မိနေဆဲဖြစ်တဲ့ နောင်လည်း မှတ်မိနေဦးမဲ့ ကျွန်တော့်ရဲ့ လမ်းပြပုဂ္ဂိုလ်တို့ရဲ့ အကြောင်းအရာလေးကို နည်းနည်းလောက် ဒီပိုစ့်လေးထဲမှာ ရေးချင်မိသည်။ ဘိုးဘွား မိခင်ဖခင်တို့ရဲ့ အကြောင်းကို ရေးဖို့လိုတော့မယ် မထင်ပါ၊ အဘယ်ကြောင့်ဆိုသော်၊ ရေးဖို့ရာ စာသားဖွဲ့ဆိုဖို့ရာ မမှီနိုင်အောင်မို့...။
-------------------------ထ-----------------------------ထ---------------------ထ-----------------------

အန်တီခင်
ဘ၀ဆိုတဲ့ ရေစီးကြောင်းကို ဖောက်လုပ်ပေးခဲ့တဲ့ ကျွန်တော်တို့ရဲ့ အန်တီခင် ဟာ မိသားစုအတွက် ပေးဆပ်သွားတဲ့ ပေးဆပ်မှုတွေဟာ တုနှိုင်းမမှီခဲ့ပါ၊ သူဆုံးသွားတဲ့အချိန်မှာ ရွှေတောင်ကြီးပြိုကျသွားသလို ကျွန်တော့်ရဲ့ စိတ်ထဲ ခံစားမိသည်။ ငွေကြေးကြောင့်မဟုတ်ပါ၊ သူပြောသမျှ လုပ်ဆောင်သည်၊ သူပြောသမျှ နားထောင်သည်၊ တနည်းပြောရရင်ဖြင့် သူ့ကိုမိသားတစ်စုလုံးအပြင် ပတ်ဝန်းကျင်ကပါ လေးစားရိုသေသောကြောင့်ဖြစ်သည်။ ၀မ်းနည်းခြင်း၊ နှမျောတမ်းတခြင်းများစွာဖြင့် ဒီပိုစ့်လေးနဲ့အမှတ်တရဖြစ်စေဖို့ရေးလိုက်ပါသည်။
“လူတစ်ယောက်ရဲ့တန်ဖိုးဟာ အဲ့ဒီလူမရှိတော့မှ သိရတဲ့အဖြစ်မျိုးဟာ ရင်နာစရာပါ”

ကျေးဇူးရှင်မွေးစားဖခင်
ရေစီးကြောင်းပေါ်ကနေ လှေမတိမ်းမမှောက်စေဖို့ တက်ကိုကောင်းစွာလှော်တတ်စေဖို့ အင်းအားတွေ ပေးပြီး ဆယ်နှစ်ကျော်ကျော် ပြုစုပျိုးထောင်ပေးခဲ့တဲ့ ကျွန်တော့်ရဲ့ချစ်လှစွာသော မွေးစားဖခင်၊ အခုတော့ သူဟာ လောကကြီးထဲကနေ ကျွန်တော့်ကို နှုတ်မဆက်ပဲ အသိမပေးပဲ နှုတ်ဆက်သွားခဲ့တယ်ဗျာ...၊ သူလောကကြီးကနေ ထွက်ခွာသွားတာ အခုဆိုရင် နှစ်တွေကြာခဲ့ပါပြီ၊ သူလောကကြီးထဲကနေ ထွက်ခွာသွားတဲ့နေ့ရက်တွေကို မသိလိုက်ရတဲ့ ကျွန်တော့်အဖြစ်၊ ဆုံးပါလို့ဆုံးပါသွားမှန်းမသိတဲ့ ကျွန်တော့်ရဲ့အဖြစ်၊ တစ်ကယ့်ကို ကျွန်တော့်ရဲ့ ရင်ထဲ စိတ်ထဲ ၀မ်းနည်းကြေကွဲမိသည်။ သူဆုံးသွားတာကို (၂)နှစ်ခန့်လောက်မှ ကျွန်တော်သိလိုက်ရသည်။ ညစဉ်အိပ်မက်တွေထဲ ကိုယ်ယောင်လာပြတာကို ကျွန်တော်နားမလည်ခဲ့၊ ကျွန်တော်တို့ မိသားစုထံပြန်လာတဲ့ပုံစံ ခဏခဏ အိပ်မက်မက်နေမိသည်။ တစ်ကယ်တော့ ကျွန်တော့်ရဲ့အဖေ ကျွန်တော့်ဆီ ပြန်မလာနိုင်ခဲ့ပါ။ ဆယ်နှစ်ကျော်ကျော် သံယောဇဉ်၊ ဆယ်နှစ်ကျော်ကျော် ကျေးဇူးတွေ အင်အားတွေ ပြောင်းလဲမှုတွေအားလုံးဟာ အမှတ်တရနေမှာပါ။ အပိုတွေ မပြောတတ်ပါဘူး။ ကျွန်တော့်ရဲ့ ရင်ထဲအခုထိ ၀မ်းနည်းနေလျက်ပါ။ အမှန်ကိုပြန်ပြောရရင် ကျွန်တော့်ရဲ့ ကျေးဇူးရှင်ဖခင် ဆုံးပါးသွားသည်ကို မယုံနိုင်ဖြစ်နေဆဲ...။
“လူတစ်ယောက်ရဲ့တန်ဖိုးဟာ အဲ့ဒီလူမရှိတော့မှ သိရတဲ့အဖြစ်မျိုးဟာ ရင်နာစရာပါ”

ကိုရီး{ကိုကြီး}
ဘ၀ရေစီးကြောင်းတွေထဲ ရေနစ်နေသူကို ၀ါးကူလို့ထိုး ဆိုသလို အစ်ကိုမရှိတဲ့ ကျွန်တော့်ဘ၀အတွက် အစ်ကိုအရင်းတစ်ယောက်လို ဘွားကနဲ့ပေါ်လာသူကတော့ ကိုရီးလို့ခေါ်တဲ့ ကိုရီး{ကိုကြီး}ပါ။ ပေးဆပ်သူတို့ဟာ ဘာကိုမှ မမျှော်လင့်ပါဘူး၊ သူတို့မျှော်လင့်တာ ပီတိတစ်ခုပါ။ အဲ့လိုပါပဲ ကိုရီး လည်းထို့အတူပါ။ လူတစ်ယောက်က ကိုယ်အပေါ်ကျေးဇူးတွေပြုလွန်းတာ များလာတဲ့သူကိုအခါ ကျွန်တော့်အနေနဲ့ “ကျေးဇူးတင်ပါတယ်”လို့ မပြောတော့ပါဘူး၊ အတ္တကြီးတာ မဟုတ်ပါ၊ ကျေးဇူးတင်တယ်လို့ ပြောဖို့ မလုံလောက်တော့လို့ပါ၊ သူတို့လိုချင်တာလည်း ကျေးဇူးတင်တယ်ဆိုတဲ့ စကားမဟုတ်ပါဘူး၊ သူတို့ဖြစ်စေချင်တဲ့ ဖြစ်သင့်တဲ့ ပုံစံမျိုးကို အန်ဝင်ခွင်ကျဖြစ်သွားဖို့ပါ၊ အဲ့ဒီအခါ သူတို့လိုချင်တာက ပီတီတစ်ခုသာ...။ သူဟာ ကျွန်တော့်အပေါ် အရမ်းကောင်းတဲ့ အစ်ကိုကြီးတစ်ယောက်ပါပဲ။ မည်သို့ဖြစ်စေ ကျွန်တော့်ရဲ့ရင်ထဲ ကျွန်တော့်ရဲ့အသိဉာဏ်ထဲ အရာအားလုံးကို ဘယ်တော့မှ မေ့လို့မရသလို မေ့မှာလည်းမဟုတ်တော့ပါ။
“ဘယ်ဘ၀ရဲ့ ရေစက်ရယ်မသိ၊ ညီအရင်းအစ်ကိုပမာ၊ ချစ်ခင်ရင်းသာ”


ဒီအပုဒ်လေးကတော့ ကျွန်တော့ဘ၀ရဲ့ မမေ့နိုင်စရာ ကျေးဇူးရှင်ကြီးများကို ထည့်ရေးလိုက်ခြင်းဖြစ်ပါသည်။
-----------------------ထ-----------------------------ထ---------------------ထ-----------------------


ကျွန်တော် ဘလော့စရေးတဲ့ ၂၀၀၇ ကနေ ဒီနေ့အထိ ကျွန်တော်ဘာရေးရေး ဖတ်ရှုခံစားပေးကြသော စာဖတ်မိတ်ဆွေများနှင့် ဘလော့ဂင်းဖော်ဂင်းဖက်များကိုလည်း ကျွန်တော့်ရဲ့ မွေးနေ့ အထူးပိုစ့်လေးမှာ လေးစားစွာဖြင့် မှတ်တမ်းတင်အပ်ပါသည်။

(၃.၂.၂၀၁၁)ဟာ ကျွန်တော့်ရဲ့ နှစ်ဆယ့်ခြောက်နှစ်မြောက်မွေးနေ့ဖြစ်ပါသည်။ ဒီပိုစ့်လေးဟာ ကျွန်တော့်ရဲ့ မွေးနေ့ပိုစ့်အဖြစ်ရေးသားခြင်းဖြစ်ပါသည်။ အားလုံးပဲ ကိုယ်စိတ်ကျန်းမာ ချမ်းသာကြပါစေလို့ နှုတ်ခွန်းဆက်သလိုက်ပါ၏