ဖေဖော်ဝါရီ ၁၃ သို့ အိတ်ဖွင့်ပေးစာ

"ဒေါင် ဒေါင် ဒေါင် ဒေါင်"

သံခေါင်းခေါက်သံကြောင့် ကျွန်တော်လန့်နိုးလာသည်။ နှိုးစက်နာရီလေးကို ကြည့်လိုက်တော့ မနက်လေးနာရီထိုးနေပေပြီ။ ဘယ်နှနာရီပဲထိုးထိုး ကျွန်တော့်အတွက်ကတော့ အမြဲစောနေသေးတာပဲမို့ အပေ့ါအပါးလေးသွားပြီး ပြန်အိပ်ဦးမည်။ သူများတွေ မေးရင်တော့ မနက်လေးနာရီထတယ်ပေါ့။ ဒါနဲ့ပဲ အိပ်ရာထဲကို အိပ်မှုံစုံမွားနဲ့ ကမူးရှူးထိုးပြန်အ၀င်မှာ စာကြည့်စားပွဲခုံကို ၀င်တိုက်မိလေသည်။ တစ်စုံတစ်ခုပြုတ်ကျသွားသံကိုကြားလိုက်ရတော့ ယောင်ယောင်ယမ်းယမ်းနဲ့ မှောင်ထဲမည်းထဲမှာ ကြမ်းပြင်ကိုလက်နဲ့ လိုက်စမ်းနေလိုက်သေးသည်။ နောက်...မီးဖွင့်ကြည့်လိုက်တော့မှ ပြုတ်ကျသွားတာက ရွက်စုတ်ပြကဒိန်လေး။ အိပ်ချင်မူးတူးနှင့် ပြီးသွားသော မနေ့ကရက်စွဲစာရွက်လေးကို ဆုတ်ဖြဲလိုက်မိသည်။ ဒီနေ့ရက်စွဲကိုကြည့်ပြီး မျက်လုံးများပြူးကျယ်ကာ အိပ်ချင်စိတ်တို့ လွင့်ပျောက်သွားသည်။ ဒီနေ့ ၁၃ ရက်နေ့ပါလား။ တိတိကျကျဆိုသော် ဖေဖော်ဝါရီ ၁၃ ရက်နေ့။ ကိုယ့်ဘာသာကို မေ့မှာစိုးသောကြောင့် ပြကဒိန်အောက်ခြေတွင် မင်နီဖြင့်ရေးထားသည့် စာကြောင်းလေး....."ဗိုလ်ချုပ်မွေးနေ့"....။

ပြန်အိပ်လို့မဖြစ်တော့ အိပ်လို့လည်းရတော့မည်မဟုတ်ပေ။ ဘုရားရှိခိုး ကောင်းမှုကုသိုလ်လုပ်ပြီး ဗိုလ်ချုပ်အတွက် အမျှဝေရမည်။ ဗိုလ်ချုပ်မွေးနေ့အတွက် တတ်နိုင်သလောက်ကောင်းမှုကုသိုလ်လုပ်ပေးရမည်။ ကမန်းကတမ်း မျက်နှာသစ် ကိုယ်လက်သန့်စင်ပြီး ဘုရားခန်းထဲဝင် ဘုရားပန်းအိုးလဲ၊ သောက်တော်ရေ မျက်နှာသစ်တော်ရေကပ်ပြီး ငါးပါးသီလခံသည်။ ထို့နောက် မေတာသုတ်၊ ပဌာန်းအကျဉ်း စသဖြင့် စသဖြင့် ကိုယ်တတ်သလောက် မှတ်သလောက်ရွတ်ဖတ်ပူဇော်လိုက်ပြီး ဗိုလ်ချုပ်အတွက် သီးသန့်ရည်စူးပြီး မေတာပို့အမျှဝေလိုက်သည်။ အမျှဝေပြီးနောက် ပြတင်းတံခါးတွေဖွင့်ကာ ရောင်နီသန်းစပြုလာသော အရုဏ်ဦးအလှကိုကြည့်ရင်း ဗိုလ်ချုပ်အကြောင်းကို တွေးနေမိသည်။

ဒီကနေ့ ဗိုလ်ချုပ်သာ သက်ရှိထင်ရှားရှိပါက ယခုမွေးနေ့သည် (၉၆) နှစ်မြောက်မွေးနေ့ဖြစ်သည်။ (၉၆) နှစ်ဆိုတော့ အဖိုးကြီးအရွယ်ပေါ့။ ထို့ကြောင့် အသက်ရှင်လျက်ရှိသေးပါက ခါးကုန်းကုန်း နားထိုင်းထိုင်း ဆံပင်တွေဖြူကာ ပါးရေနားရေတွေတွန့်နေမည်ဖြစ်သော ဗိုလ်ချုပ်၏ပုံကို မှန်းဆမြင်ယောင်ကြည့်နိုင်သည်။ သို့သော်....သို့သော်... ဗိုလ်ချုပ်သည် ဂဠုန်စောနှင့်အပေါင်းပါတို့၏လက်ချက်ဖြင့် ငယ်ရွယ်ဖျတ်လတ်သော အသက်(၃၂)နှစ်အရွယ်တွင် ဘ၀တစ်ပါးသို့ ကူးပြောင်းခဲ့ရသည်။

အခြားသူများအတွက်တော့ မသိ။ ကျွန်တော့်စိတ်ထဲတွင်မူ ဗိုလ်ချုပ်အောင်ဆန်းဟုဆိုလျှင် (၉၆)နှစ်အရွယ် ဖိုးဖိုးကြီးအောင်ဆန်းအစား (၃၂)အရွယ်ငယ်ရွယ်ဖျတ်လတ်တက်ကြွသော ကိုအောင်ဆန်း၏ပုံရိပ်များကိုသာ မြင်ယောင်နေမိသည်။ တနည်းဆိုသော် အသက်က ၉၆-နှစ် သို့သော် အရွယ်ကား ၃၂-နှစ်။ ကျွန်တော့်အသက်က ၂၅ နှစ်ဆိုတော့ ဗိုလ်ချုပ်ကို ကိုယ့်အဖိုးရင်းကဲ့သို့တစ်မျိုး အစ်ကိုကြီးကဲ့သို့တစ်မျိုး လေးစားချစ်ခင်နေမိသည်။ ဗိုလ်ချုပ်ကို မမီလိုက်သော်လည်း ဗိုလ်ချုပ်အကြောင်းရေးထားသော စာအုပ်များနှင့် လူကြီးသူမများ၏ ပြန်လည်ပြောပြချက်များကို ပြန်လည်နားထောင်ရုံမျှဖြင့် ကြက်သီးမွေးညင်းထလောက်အောင် လေးစားကြည်ညိုမိလေသည်။ မြန်မာပြည်သူလူထုအပေါ် ဗိုလ်ချုပ်ထားခဲ့သော ပြင်းပြစူးရှသည့် မေတာစေတနာအရှိန်အဟုန်သည် လူထုတစ်ရပ်လုံး၏နှလုံးသားများကို ယနေ့အချိန်ထိ ရိုက်ခတ်နေဆဲ ရိုက်ခတ်နေလျက်ရှိသောကြောင့် ကျွန်တော်တို့ကဲ့သို့ ဗိုလ်ချုပ်ကို မသိမမီလိုက်သော လူငယ်များသည်ပင် ဗိုလ်ချုပ်ကို လေးစားချစ်ခင်ပြီး တိုင်းပြည့်ခေါင်းဆောင်အဖြစ် ရာနှုန်းပြည့်သတ်မှတ်လက်ခံထားကြခြင်းဖြစ်ပေမည်။ ယခု ကျွန်တော်ရေးနေသောစာကို ဒီအထိဖတ်နေသေးသည်ဆိုလျှင် စာဖတ်သူသည်လည်း ဗိုလ်ချုပ်အား ကျွန်တော်ကဲ့သို့ လေးစားကြည်ညိုသူတစ်ဦးဟု မှတ်ချက်ချရပေမည်။ တနည်းဆိုသော် စာဖတ်သူသည် မျိုးချစ်စိတ်ဓာတ်ရှိသူတစ်ဦးဟု ကောက်ချက်ချနိုင်ပေသည်။

လောကတွင် "မစားဘဲနှင့်စွန့်သောသူ" "မစွန့်ဘဲနှင့်စားသောသူ" ဟုနှစ်မျိုးရှိပေရာ ဗိုလ်ချုပ်သည် ပထမအမျိုးအစားဖြစ်လေသည်။ ရာထူးရာခံကြီးကြီးမားမားရရှိခဲ့သော်လည်း လာဘ်လာဘ မယူမစားခဲ့။ အခွင့်အရေးတွေ ကြီးကြီးမားမားရခဲ့သော်လည်း မယူ၊ အလွဲသုံးစားမလုပ်ခဲ့ဘဲ တိုင်းပြည်နှင့်လူမျိုးအတွက် ကိုယ်ကျိုးစွန့် အသက်စွန့်ကာ အလုပ်လုပ်ခဲ့သည်။ လွတ်လပ်ရေးအတွက် ခနာနှင့်ဦးနှောက်ကို မနေမနားအလုပ်ပေးခဲ့ရသည်။ နိုင်ငံရေး သံတမန်ရေး လူမှုဆက်ဆံရေး တောင်တန်းနှင့် မြေပြန့်သင့်တင့်ရေး စသည့် စသည့် အရေးပေါင်းသောင်းခြောက်ထောင်ကို ဖြေရှင်းခဲ့ရသည်။ တကယ့်ခံစားစံစားရမည့် အချိန်ကာလရောက်တော့မှ ဘ၀တစ်ပါးသို့ ကူးပြောင်းသွားရရှာသည်။ ဗိုလ်ချုပ်သက်တမ်းတလျှောက် ဘာဆိုဘာမှ မယ်မယ်ရရ ခံစားစံစားရခြင်းမရှိဘဲ တိုင်းပြည်နှင့် လူမျိုးအတွက် စွန့်လွှတ်အနစ်နာခံခဲ့သော "မစားဘဲနှင့် စွန့်သောသူ" စစ်စစ် ဖြစ်သည်ကို ယုံမှားဖွယ်မရှိပေ။

ဗိုလ်ချုပ်တို့ သက်စွန့်တိုက်ပွဲဝင် မနေမနား ကြိုးစားခဲ့ခြင်းကြောင့်သာ ယနေ့ ကျွန်တော်တို့သည် မစွန့်ဘဲနှင့်စားနေရခြင်းဖြစ်သည်ကို သဘောပေါက်သင့်ပေသည်။ အခြား အခြားသော မစွန့်ဘဲနှင့် အားပါးတရ စားနေသောက်နေကြသောသူများသည်လည်း သဘောပေါက်သင့်ပေသည်။ ကြွေးတင်လျှင် ကြွေးဆပ်ရသကဲ့သို့ ကျေးဇူးတင်လျှင်လည်း ကျေးဇူးဆပ်ကြရပေမည်။ ထိုကျေးဇူးကိုလည်း မမေ့အပ် မမေ့စကောင်းပေ။ ဖေဖော်ဝါရီ (၁၄)ရက်နေ့ကို ချစ်သူများနေ့ဟု အားလုံးသိကြသော်လည်း ဖေဖော်ဝါရီ (၁၃)ကိုကား ဗိုလ်ချုပ်မွေးနေ့ဖြစ်ကြောင်းကို မေ့နေသော လူတော်တော်များများ သတိချပ်သင့်ပေသည်။ (မှတ်ချက်။ ။ "တော်တော်များများ" ဆိုသည်မှာ တော်တော်လေးများနေသည်ကို ရည်ညွှန်းသည်။)

ကျွန်တော့်အတွက်မူကား ဗိုလ်ချုပ်အောင်ဆန်းသည် စတင်မွေးဖွားသော မွေးနေ့ရှိ၏ (၁၃.၂.၁၉၁၅ ကိုဆိုလိုသည်)။ ထို့ပြင် ကျရောက်လာမည့် နှစ်တိုင်းနှစ်တိုင်း၏ ဖေဖော်ဝါရီ ၁၃ ရက်တိုင်းအတွက်လည်း မွေးနေ့ရှိနေဦးမည်ဖြစ်၏ (ယခု ၉၆ နှစ်မှသည် နောက်နှစ်ပေါင်းများစွာကိုဆိုလိုသည်။) သို့သော် သေဆုံးသည့်နေ့ကား ဘယ်တော့မှ ရှိမည် မဟုတ်ပေ။ မွေးနေ့တွေကျရောက်ပြီး အသက်တွေဘယ်လောက်ပင်ကြီးသော်ငြား ဗိုလ်ချုပ်သည် (၃၂)နှစ်အရွယ်ဖြင့်ပင် ငယ်ရွယ်ဖျတ်လတ်တက်ကြွလျက် မြန်မာပြည်သူလူထုကို ဦးဆောင်လျက်ရှိနေဦးမည် ဖြစ်ပေတော့သည်။



မကြာခင်ကျရောက်တော့မည့် လွတ်လပ်ရေးဖခင်ကြီးဗိုလ်ချုပ်အောင်ဆန်း၏ (၉၆)နှစ်မြောက်မွေးနေ့အတွက် ကြိုတင်ဂုဏ်ပြုရေးသားသည်။